23 тамызда Құрылтай сайлауы өтеді. Бұл елдің жаңа жоғары өкілді органын қалыптастыратын тарихи саяси науқан болмақ. Алдағы бес жыл ішінде заң шығару қызметін жүзеге асырып, мемлекеттік маңызы бар шешімдерді қабылдайтын 145 депутаттан тұратын бір палаталы Құрылтайдың құрамы дәл осы сайлау арқылы айқындалады.
Құрылтайдың құрылуы саяси реформалардың маңызды нәтижесі ретінде бағаланып отыр. Бұрынғы екі палаталы Парламенттің орнына бір палаталы өкілді органның енгізілуі заң шығару үдерісін оңтайландырып, шешім қабылдау тетіктерінің тиімділігін арттыруды көздейді. Сонымен қатар жаңа институттың атауы қазақ мемлекеттілігінің тарихи дәстүрлерімен сабақтасып, халықтың ортақ мәселелерді талқылау және шешім қабылдау мәдениетінің жалғасы ретінде қарастырылады.