Халықаралық турнирде топ жарды
Жамбылдық жас боксшылар халықаралық додада топ жарып, ел мерейін асқақтатты. Қырғызстанның Ош қаласында өткен III халықаралық WBC AMATEUR TURKSOY турнирінде Қазақстан құрамасы 6 медаль жеңіп алды. Оның үшеуі – алтын, біреуі – күміс, екеуі – қола. Түркітілдес алты елден 34 спортшы қатысқан жарыста Жамбыл облысының үш өкілі де жүлдегерлер қатарынан көрінді.
Өңір боксшыларын жарысқа дайындағандардың бірі – Қазақстан кәсіпқой бокс федерациясының Жамбыл облысы бойынша аға жаттықтырушысы Ермек Секербаев. Оның жетекшілігімен облыс құрамасы биыл Қазақстан чемпионатында жалпыкомандалық есепте бірінші орын алған.