ЖИ-ді әртүрлі жастағы азаматтарға үйрету жобалары жалғасып жатыр

Жасанды интеллектті жаппай меңгеру мақсатында әртүрлі жастағы азаматтарды оқыту жобалары жүзеге асып жатыр. Мәселен, 12-18 жастағы жасөспірімдерге арналған TUMO Astana орталығында бағдарламалау, робототехника, 3D-модельдеу, анимация және генеративті ЖИ бойынша тегін сабақ өтеді. Қазір орталықта 2 мыңнан астам оқушы білім алады. Ал 18 жастан асқандарға Tomorrow School бағдарламасы бар. 14 өңірде іске қосылды. Қатысушылар 18 ай бойы білім алып, 50-ден астам практикалық жобаны жүзеге асырады және тағылымдамадан өтеді. Жоғары білім беру саласында AI-Sana бағдарламасы жұмыс істеп тұр. Оның аясында 100 мыңнан астам студент саланы тереңдете оқыды. Сондай-ақ, ЖИ бойынша кәсіби мамандар даярлау үшін "Қазақ эй-ай рисёрч юниверсити" жұмысын бастады. 1 қыркүйектен бастап мұнда бакалавриат және магистратура дәрежесінде білім алу үшін 525 студент құжат тапсырған. Мемлекеттік қызметшілерді де үйрету жалғасып жатыр. AI Qyzmet бағдарламасы бойынша 55 мыңға жуық маман білім алды.