Президент Баварияға барды
Мемлекет басшысының Германияға ресми сапары жалғасып жатыр. Бүгін Президент Мюнхен қаласына барды. Қасым-Жомарт Тоқаев Бавария Үкіметі мен Ландтаг басшыларымен және бизнес-құрылым өкілдерімен кездесу өткізді.
Бавария. Автоөндіріс алыптарының аймағы. Бақуатты, бәсекеге қабілетті өңір. Германия экономикасының бестен бірі осы жерге тиесілі. Былтыр жалпы ішкі өнімі 824 миллиард еуродан асты. Демек, экономика әлеуеті бойынша әлем елдерімен бәсекеге түссе жаханда жиырмалыққа жақындап тұр. Жер жүзіне танылған өндіріс орындары да осында. BMW, Ауди, Siemens, MAN және Infineon секілді әлемдік компаниялардың бас кеңселері осында орналасқан. Былтыр Бавария 227 миллиард еуроның тауарын экспортқа шығарды.