Тараздың таңы кофеден басталмайды. Ол тазалықтан басталады. Көне шаһар күн сайын тұрғындарын таза да көрікті келбетімен қарсы алады. Бірақ біз ұйқыда жатқанда осы тазалық пен тәртіпті қамтамасыз етіп жүрген жандар туралы ойланып көрдік пе? Қаланың ажарын ашуға коммуналдық қызметкерлер ғана емес, қарапайым тұрғындар да өз үлесін қосады екен.
Тараздың тазалығы – мыңнан астам адамның күнделікті еңбегінің нәтижесі. «Жасыл Ел – Тараз» мекемесінің қызметкерлері таңның атысынан кештің батысына дейін көшелерді тазалап, қаланы көркейтуге атсалысады. Алайда тазалық тек коммуналдық қызметтің ғана міндеті емес. Өз ауласын күтіп, гүл егіп, айналасын көркейтіп жүрген тұрғындар да жетеді. Олардың арқасында көпқабатты үйлердің маңы жайқалған жасыл баққа айналған.