Жыл өткен сайын Наурыз мейрамы елімізді мекендеген бүкіл халықтың, ұлт пен ұлыстың сағынып күтетін ортақ мерекесіне айналып, жаңа мазмұнмен, жарасымды сән-салтанатымен түрлене түсуде. Биыл да бұл игі үрдіс өзінің дәстүрлі жалғасын тапты. Киелі Әулиеата өңірінде де той-думан Наурыздың 14-ші жұлдызынан басталды. Амал мерекесі қайырымдылыққа, ата-баба рухына тағзым ету, көріктендіру мен көгеріштендіру сынды ізгілікті істерге ұласып, ал 21-22 Наурызда жер-жерде ақ шаңқан үйлер сап түзеп, ұлттық құндылықтарымыз дәріптелді.