Жамбыл Жабаев туғанына 180 жыл толуына орай Мойынқұм ауданы, Мойынқұм ауылындағы Ж.Жабаев атындағы мектеп-гимназиясында ашық есік күні өтті. Рухани маңызы зор шараның мақсаты – оқушыларға ақын мұрасын терең танытып, тарихи тұлғаның болмысын заманауи тәсілмен насихаттау және жас ұрпақтың әдебиетке қызығушылығын арттыру.
Мектеп алаңы ұлттық нақышта безендіріліп, көрме бұрыштарында ақынның өмірі мен шығармашылығына қатысты тың деректер, фотосуреттер мен кітаптар көпшілік назарына ұсынылды. «Жамбыл әлеміне саяхат» бағдарламасы мазмұнды бөлімдермен жалғасты. «Бала Жамбыл» медиа сағатында оқушылар ақынның балалық шағы, өскен ортасы мен ұстаздары жайлы деректі бейнематериалдар ұсынып, оның жастайынан суырыпсалмалық өнерге бейімділігін әсерлі түрде жеткізді.